GURİ ÇİÇKU NANA
Mu qvina vargugaçedinu qona,
K`ap’ula k`ele elagiskidu 3`ana,
Dixçini do xolo vardugaç’k`inden,
K`ap`et’i xe skanis gogixta nana.
Nisa moxti p`ulyaşi oput`eşa,
Damtire do mtirişi oxorişa,
Arçkvati aş teği berepe ordi,
Ğormotik giz’i3as guri skanişa.
Ont`ule, oxori, qonaşi dulya,
Dop’aminon yado varz`iri dunya,
Guri na-komeçi berepe skanis,
Arçkva şuri skani meçap gyozgiya.
Puci na-nç’valupti limci, çumani,
Tkumert’i “dulyaren çkimi dermani”
Ntxirepunas na k`vati dişkape,
Muç`oşi tirupti gza entumani.
Do3`ili qurz`eni, mjolepe patxi,
Ar 3`ana pekmezi vardopa vartkvi,
Pekmezi do kyumepe çkin vimxortt’aşi,
Sin xolo siniten lazuti şatxi.
Vardugaç’k`indeni şurimşine nana,
Vardogibağu ek`o ntxirepuna,
Arçkva pincopunas içalişepti,
Xoloti gorupi ç’anç’axepuna.
A3`inerepe varenan skani stei,
Mu meci uçkinan mu ti noderi,
Skani stei gyari nam nisa iqips,
Gyari varaxvenenan nostoneri.
K’alatiten tiri monk`a 3’anape,
Domi3`vi k`ai, pat`i, mskva nenape,
Ham dunya do emk`eleti ixelas,
Skani stei guri çiçku nanape.
Guma 2001
Timur Cumhur P’uliaşi NOT : "P`ulya" Akçakoca'da yaşayan, benimde mensubu olduğum bir (aile) sülaledir.