ƷANƷA
Ma aǯi ʒanʒa ǩ’apulas mok’ideri , tomaçkimi ixis e3xeri meçameri gzas gebdgitur…
VİLDAN LOKUMCU MANELİŞİ
******
Ar ǩele Lazuri, ar ǩele Turkuli do majura ǩele Rusişi Tchaikovsky-şi birapapes na usibint̆u p̌ap̌uliçkimişi meselepe; Didi ǩabğaşi ndğalepes oç̌komale mu na žiras manžageremutepeşi( komşuları) ǩala isa na imxort̆es ǩoçepeşi meselepe; mitis geç̌areli na var uğut̆es orapes ar çifti çaruğişeni ar ndğas na içalişinet̆u ndğalepeşi meselepe; Dişka steri, arguniten na ipağen didi çxomepe na skidut̆es Uça Mzoğaşi meselepe; kimoli-oxorca, biç̌i- ǩulani isa tiyatro na ikipt̆es kyoişi ǩoçepeşi meselepe ogneri….
İlakteri Turkulimuşiten, Lazuri na ğarğalapan ǩoçepes na gyadiʒep̌t̆es Lazepe….
Kyoyişi oxori na naşkves do noğa noğa ya do xomula otxo darabaşi doloxe mutu uxvenu na doxedes, oǩule-ti mutu užiramu-steri çkva do çkva ontulepes mu na žiran malave puci-steri na noles ǩoç̌epe…
Pukirepe steri gzaşi yanis na gonǯǩes plastiği çopepe…
T̆ura yopşa ç̌uryaşi kyoki majurani ulkepeşa na gamiçinet̆u ndğalepe…
Mara xolo neǩna gonǯǩeri na doxedinet̆u, neǩna varnot̆anǩaşa oxorepeşa na amilinet̆u dğalepe….
Ncaepeşi jin, ğali do t̆ibapeşi doloxe, mtel kianaşi skindinapeten na isterinet̆u orapeten na miǩilap̌t̆u berobaşi ndğalepe…
Ǩata ondi oramuşis na vimxort̆it orape žireli dovirdi…
Oǩ’ule…
Ar-jur oǩroşeni şuri do guri na gamaçapanpe…Mututen na var izğen tolepeten na iǯǩenanpe…Ǩai-p̌at̆i varoǯǩedaşa, didi mi ren na emuşi ǩudelis na niǩidenanpe…
Lazuri na oxoǯonapan mara na varağarğalenanpe… Çkva muepe do muepe bžiri…
********
Ma aǯi…ʒanʒa ǩap̌ulas moǩideri, tomaçikimi ixis e3xeri meçameri gzas gebdgitur…Na varit̆alaxu, na varipintu perepe ( renkler) ožiramuşeni…Ožiramu do oǯiramuşeni…
Ma?
Salaxana!
Ǯanağani / Ocak 2014